O isi lamatiaga

E tele lamatiaga eseese i totonu o Niu Sila. Saili i faamatalaga o isi ituaiga lamatiaga ma tagata o puleaina.

O ai e puleaina isi lamatiaga matautia?

E eseese pulega o galulue faatasi e pulea faalavelave faafuasei ma tausisia le saogalemu o tagata. E faalagolago le pulega na te taitaia galuega e tali atu ai i le ituaiga lamatiaga po o le faalavelave faafuasei.

O nisi o faalavelave faafuasei e moomia le faamaopoopo o auaunaga eseese. Afai o se tulaga lea o le a iai, e ono faia se faaaliga o faalavelave matuia faalotoifale po o le atunuu atoa.

Faama'i pepesi i le lalolagi

E tupu se faama'i e pepesi i le lalolagi pe a vave salalau se siama ma ua aafia ai se atunuu po o le tele o atunuu i le lalolagi atoa. A tupu le tulaga lea, e toatele lava i tatou o le a mama'i ai.

O le Matagaluega o Soifua Maloloina o le vaega lea e taimua i le fuafuaina ma le tali atu i faama'i pepesi i le lalolagi i Niu Sila.

Afi

A e vaaia se asu po o se afi ma e te talitonu e lamatia ai tagata po o meatotino, vili le 111 ma talosaga vave loa mo le vaega o le 'Fire.'

E mafai ona mafua se afi e mumū ona o gaioiga o fai e tagata. Mo se faataitaiga o afi ua sasao mai se nofoaga o tolauapi ai, mea faapāpā, po o tainaafi, afi tele po o se mu i nofoaga i uta ua lē mafai ona taofiofi le sasao. O taavale lavevea, mea sipāka po o laina eletise ua palalasi o isi nei o mafuaaga masani o le tupu o se afi. E faapena foi i uila pāpā mai moavao po o muli sikaleti.

O le matafaioi a le Fire and Emergency New Zealand le foia, tali atu ma taofiofi le sasao o le afi.

Mugala

Afai ua afaina le nofoaga o e iai i le mugala e mafai ona e faafesootai le tou pulega faalotoifale mo nisi faamatalaga.

E mafai i mugala ona utiuti ai le tele o le suavai ma e mafai ona aafia ai le tele o le suavai e faaaogā ma faatupulaia ai lamatiaga o se afi.

O le matafaioi a le Ministry of Primary Industries le faatulaga o mugala eseese.

Gaioiga faasolitulafono ma faalavelave faaterorisi

E tatau lava ona faafesootai i taimi uma le 111 pe afai e ogaoga se lamatiaga i se soifua po o meatotino.

E saogalemu lava Niu Sila ae e lē aunoa ma ni solitulafono. E tāua lou faia o tulaga uma e tausia ai oe lava.

E maua le fesoasoani mai le New Zealand Police i le tele o tulaga e puleaina ai faalavelave faafuasei ma le malupuipuia o le atunuu atoa. O lo latou matafaioi foi le faamalosia o tulafono ma le foia o soligatulafono. Latou te fesoasoani foi e faatumau le saogalemu o tagata lautele.

Vili le 105 e lipotia i ai mea ua tupu ma e lē moomia vave ai le fesoasoani a le Ofisa o Leoleo.

Meaola ma laau faalafuā ma faama'i

O le Ministry for Primary Industries e taimua i faiga faavae o malupuipuia ai mea e ola i Niu Sila. E aofia ai galuega e tali atu ai pe a sasao meaola ma laau faalafuā ma faama'i.

O le Ministry for Primary Industries e taimua foi i faiga faavae o malupuipuia ai meaai i Niu Sila. E puipuia le soifua maloloina ma le soifua manuia o tagata o faaaogāina auaunaga i totonu o le atunuu ma atunuu i fafo.

Mea matautia

O mea matautia e faasino i soo se mea po o ni vailaau e filogia ai mea e ono pāpā, sasao ai le afi, elea ai uamea, pe 'ona ai le siosiomaga.

O le Fire and Emergency New Zealand o le matagaluega e taimua i faalavelave faafuasei mo mea matautia.