Ia saogalemu lelei le tou fale

E lē mafai ona tatou valoia mala, ae e mafai ona tatou nofo sauni i ai. O lou fale o le tasi lea o nofoaga pito sili ona lelei e amata mai ai. Saili i faamatalaga i auala e mafai ai ona saogalemu lelei lou fale.

Auala e saogalemu lelei ai lou fale

E iai auala e mafai ona e faia e faaitiitia ai aafiaga o faalavelave faafuasei ia te oe ma au meatotino.

• Faaaogā puipui po o manoa e faamau lelei ai meafale maualuluga toe mamafa i le puipui o le fale.
• Tuu mea mamafa ma taei gofie i le fata po o le kapoti pito i lalo.
• Faatautau ata ma fāata i matau e fetaui lelei ona faatautau ai (aua le faatautaua i le  fao e tasi).
• Ia e iloa ma le mautinoa le ki e tapē ai se mea pe a tupu se faalavelave faafuasei ma tapē ai le kesi ma le suavai.
• E iai piliki ma alāasu sima e solofa gofie pe a lūlū se mafuie. Tagai i le upegatafailagi Natural Hazards Commission Toka Tū Ake mo nisi faamatalaga i auala e saogalemu lelei ai alāasu.
• Afai e lē pipii le faavae o lou fale i le eleele, siaki po o i se tulaga lelei. Siaki po o pipii lelei le faavae o le fale ma le tino o le fale.

Talu mai Fepuari 2021, na iai suiga ua faia i le New Zealand's Residential Tenancy Act. O nei suiga ua faafaigofie ai mo tagata mautotogi ona faia suiga i le fale ina ia saogalemu mai mafuie. Afai e te nofo mautotogi ma e te manao e fai se suiga i le fale ina ia saogalemu mai mafuie, ia mautinoa e te talanoa muamua i le pule o le fale po o le tagata o lo o puleaina meatotino.

Siaki lau inisiua

E tāua tele le inisiua o lou fale ma meafale auā le toe faafoisia o lou aiga i tulaga lelei pe a faaleagaina meatotino i se mala. Ma le isi itu, a fai se inisiua e patino lava mo lou fale e aofia ai inisiua mo se afi (e tele na aofia ai le tulaga lea) o lona uiga e agavaa fua mo le Natural Hazards Commission Toka Tū Ake, NHCover (sa ta‘ua muamua o le EQCover).

E tāua le fai ma toe iloilo lau inisiua. O nisi o mea tāua e siaki:

• O ā mea o aofia i lau inisiua, faapea foi mea e lē o aofia i le inisiua.
• Po o lava le telē o le taui o lau inisiua e toe fau ai lou fale ma toe suia ai au mea taugata pe a mae'a se faalavelave faafuasei.

Manatua e pue le tele o ata o mea ua faaleagaina, mai se mala faalenatura. Ona e faafesootai lea o lau inisiua tumaoti e fai i ai sau talosaga. Latou te iloiloina, puleaina ma faamautu se taui o lau talosaga atoa e fai ai i latou ma sui o le Natural Hazards Commission Toka Tū Ake, e aofia ai le vaega o le NHCover.