Tapenapena mo meaola
O lau matafaioi au meaola. E moomia ona e faaaofia meaola i lau fuafuaga ma au tapenaga mo faalavelave faafuasei.
- Faaputu ia lava meaai, suavai ma mea o moomia e au meaola mo aso e tolu pe sili atu. Manatua e faaosofia le fia inu soo o meaola nai lo tulaga e masani ai pe a mafatia le mafaufau.
- Ia mautinoa o pipii se microchip i au fagafao. Lesitala au fagafao i lau fomai manu ma le New Zealand Companion Animal Register (NZCAR). Faafou faamatalaga nei ma tusi ai numera e faafesootai pe a mamao ese ma fesootaiga masani.
- Toe iloilo le pepa inisiua mo lau fagafao e te iloa ai po o aofia ai faalavelave faafuasei.
- Ave meaola faasinoala ma fagafao, pe a moomia na e alu ese ma le fale. A e iloa e te lē saogalemu ai, faapena foi na lē saogalemu meaola. Ia mautinoa e faataga au fagafao i le nofoaga o e sulufai i ai. Pe maua ai faamaumauga e faafesootai ai nofoaga e tuu ai meaola ma faletalimalo laiti e faataga ai fagafao.
Ua saunia e le Ministry for Primary Industries (MPI) fautuaga mo le faia o se fuafuaga mo au meaola. E aofia ai se lisi o ituaiga meaola eseese ma faalavelave faafuasei eseese. Tagai lelei i le lisi lea e fai ai lau fuafuaga.
Meaola faasinoala
O meaola ua aoao lelei ma faamaonia aloaia e se faalapotopotoga. E iloa e le meaola lapataiga po o le fesoasoani o moomia. E faatulafonoina na faataga meaola nei i nofoaga faitele. E ono moomia se faatagana e ave ai i se marae po o se falesa.
E faatulafonoina na lē mafai lava ona e alu i se mea e aunoa ma lau maile faasinoala. E aofia ai nofoaga o maua ai fesoasoani i taimi o faalavelave faafuasei, e pei o Civil Defence Centres.
E maua atu i le faalapotopotoga na faamaonia aloaia ai le maile se mea e faaofu ai le maile o tusi ai le igoa o le faalapotopotoga ma se faiga e iloa ai oe. E vave ai lava na lua toe faatasi ma lau maile pe a lua o eseese.
Mautinoa o faaofu le mea po o se faailoga na avatu mo le maile. E lē moomia na faaali se faamaoniga patino e maua ai le fesoasoani pe ulufale ai i se Civil Defence Centre.
Mautinoa o ave pepa e faamaonia ai lau maile ma se isi pepa faamaonia e pei o se tusi mai le faalapotopotoga e faamaonia ai.
Faamautinoa le auala e faafesootai ai le faalapotopotoga pe a uma se faalavelave faafuasei ma ituaiga fesoasoani e maua mai ai.
Mautinoa na pue se ata lata mai e iloa ai oe ma lau maile e aoga mo tulaga ua lua o eseese ai.
Faamaoti se tou fuafuaga
A tapena le tou fuafuaga mo tagata o tou nonofo faatasi, manatua ia faaaofia tagata uma. Mafaufau i mea o moomia e tagata e iai manaoga faapitoa, tagata matutua, pepe, fanau laiti, fagafao ma isi meaola.
