Tatau ona ō ese
A tupu se faalavelave faafuasei, e ono lē saogalemu nisi o fale, auala ma tuaoi i le nofo ma e ono moomia ona e tuua faanatinati lou fale.
Afai ua ō ese tagata o le tou itu auala, o fea e te agai i ai? O ā mea e ave? O ā mea moomia e meaola ma fagafao? O moomia e se isi lua te tuaoi se fesoasoani? O le ā se mamao, umi ma le vave e mafai na e malaga ai e aunoa ma se isi e maua atu ai se fesoasoani?
Teu se ato laveai
Teu se ato laveai mo tagata uma o tou nonofo faatasi. E tatau na teu ai ofu mafanafana, se fagu vai, meaai māmā, kopi o faamaumauga tāua, ma se ID o pipii ai lou ata. Manatua soo se fualaau e ono moomia. Teu i se mea e faigofie na tau i ai se first aid kit, moliuila, leitio ma maa, mea faaaoga e fealuai ai ma isi mea sili ona moomia pe a tatau na o ese loa.
Taupule po o fea le nofoaga tou te agai i ai
Taupule le nofoaga tonu e agai i ai (ma ia mautinoa o iloa e tagata uma o tou nonofo faatasi, ina ne'i eseese nofoaga o tou iai). E ono tutusa lava le nofoaga tou te agai i ai faapena ma au uo ma aiga, o le mea lena e lelei ai ona faamautinoa o iloa e i latou nei au fuafuaga.
Siaki lau sone
Afai e te nofo i totonu o se sone galulolo e tatau ona agai ese mai ai, ia mautinoa e i fafo atu ma le sone galulolo le nofoaga e te sulufai i ai.
Fuafua lelei le faiga e agai ese ai
Savali, tamoe pe vili se uila pe a mafai. Aemaise lava pe a oso se galulolo. E pisi le auala i taavale ma faatuai ai auaunaga faalavelave faafuasei faapea tagata o moomia na malaga mamao e saogalemu ai. Mafaufau le auala sili na gafatia e agai ese ai.
Faataitai ma faailoa le tou fuafuaga e o ese ai
E taua le fai o se fuafuaga sili na gafatia e o ese ai. E sili le fai o se fuafuaga lē atoatoa na i lo le leai o se fuafuaga. Tusi faamatalaga e tatau na iloa e auaunaga o fesoasoani atu e tapena ese i se nofoaga sulufai, pe a moomia lea fesoasoani.
Faataitai na o ese ma le fale e iloa ai le auala e gafatia na agai ese ai. Faailoa i isi lau fuafuaga e o ese ai. Aemaise ē o faamoemoe i ai.
Aua le galo meaola
Ave meaola ma fagafao, pe a tatau na e alu ese ma le fale. A e iloa e te lē saogalemu ai, faapena foi na lē saogalemu au fagafao. Ia mautinoa e faataga au fagafao i le nofoaga o e sulufai i ai. Pe maua ai faamaumauga e faafesootai ai nofoaga e tuu ai meaola ma faletalimalo laiti e faataga ai fagafao.
Talanoa i aafiaga
O le malamalama i aafiaga o se faalavelave faafuasei e mafai ai ona e gafataulimaina tulaga e oo i ai. Fai se tou tala ma tagata o tou nonofo faatasi ma taupule gaioiga e fai pe a tulai mai tulaga nei.
